Tön'yaq Kiprğa Rusiyä raketası töşte

Tön’yaq Kipr Törek cömhüriyätendä başqala Lefkoşa häm Girnä arasındağı Taşkent awılı tirälärenä kiçä kiçke yaqta ber cisem töşep şartla. Şunnan soñ qır cirlegendä yanğın çıqtı.

Şartlaw bulğan urındağı tikşerenülär waqıtında ber hawa apparatınıñ motor qaldıqları tabılğan. Alar östendäge rusça yazular iğ’tibarnı cälep itä.

İminlek köçläre şartlaw häm yanğın bulğan urınğa berkemne dä yaqınlaştırmadı. İlneñ viśe-prem’yerı häm tışqı êşlär ministrı Kudrät Özärsay waqıyğa urınında bulğaç Twitter aşa belderü yasadı. Ul, tikşergännän soñ, Taşkent awılı yanına töşkän cisem belän 2018nçe yılnıñ iyülendä Törkiyäneñ Gaziantep töbägendä töşkän S-200 tibındağı Rusiyädä êşlängän raketanıñ östendäge yazularnıñ ber ük buluın äytte.

Özärsay bu mäs’älä turında ğomumştab başlığı armiyä generalı Yaşar Gülär belän söyläşüen belderde. Ul Süriyä rejimı, İzrail häm regiondağı başqa illärne kürşe däwlätlärdäge keşelärneñ häm mölkätneñ iminlegenä iğ’tibar itep kiräkle çaralar kürergä çaqırdı.  

Özärsay waqıyğada ülüçe yäisä yaralanuçı bulmawın belderde. Yanğın sünderüçelär utnı kontrol’ astına alğan.

Tön’yaq Kipr Törek cömhüriyäte ilbaşı Mostafa Akıncı: “Regiondağı suğışnıñ bezneñ öleşebezgä tigän naçar sıylarınnan berse. Berençe bulıp tuğan fiker älegä şul,”-dide.  Ul regionda xozur häm totrıqlılıq teläwlären äytte.  

Tön’yaq Kipr Törek cömhüriyäte xökümäte başlığı Ärsin Tatar isä raketanıñ Süriyädäge S-200 saqlanu sistemasınıqı buluın belderde. Ul İzrailneñ höcümnärenä qarşı saqlanu maqsatı belän cibärelgän, ämma nişanın yuğaltqan bulırğa mömkin.  

Ärsin Tatar bernindi ağulı gaz yäisä ximik matdä qurqınıçı bulmawın belderde.