Venesuêladağı tüntäreleş kereşüenä dön'yanıñ mönäsäbäte

Kuba häm Boliviyä Venesuêlada üzen däwlät başlığı dip atağan Xuan Guaydo citäkçelegendäge tüntäreleş kereşüenä qarşı ikänleklären häm xäzerge xökümät tarafında buluların belderde.

Kuba däwlät başlığı Migel’ Diaz-Kanel’ üzeneñ Twitter xisabında bolay dip yazdı: “İlne dähşätkä kertüne maqsat itep quyğan bu tüntäreleş xäräkäten kisken räweştä kire qağabız. Venesuêlanıñ uramnarında terrorçılıq tudırunı maqsat itep quyğan qorallı törkemnärneñ omtılışın ğayeplibez”.

Boliviyä däwlät başlığı Êva Morales ta Maduroğa teläktäşlek kürsätte. Ul Twitterda: “Venesuêlada çitlärneñ mänfäğatenä xezmät itüçe tüntäreleş kereşüen ğayeplibez,”-dip yazdı.  

Älege mäs’älä belän bäyle belderü AQŞtan da kilde. Aq Yort ilbaşı Donal’d Trampnıñ wäzğıyät’tän xäbärdar buluın häm küzätep baruın açıqladı.  Bilgele bulğança, ul oppoziśiyä liderı Xuan Guaydoğa teläktäşlek kürsätä.

AQŞnıñ milli qurqınıçsızlıq kiñäşçese Djon Bolton da belderü yasap Venesuêla armiyäsenä möräcäğat’ itte.  “Armiyä Konstituśiyä häm Venesuêla xalqın saqlarğa, milli parlamentnıñ yanında torırğa tiyeş. AQŞ Venesuêla xalqınıñ tarafında,”-dide ul.  

AQŞ tışqı êşlär ministrı Mayk Pompeo isä: “AQŞ xökümäte bäysezlek häm demokratiyä êzläwçe Venesuêla xalqına teläktäşlek kürsätä,”-dide.

Venesuêladağı säyäsi krizista başınnan birle oppoziśiyägä här törle yärdäm kürsätkän Amerika däwlätläre oyışmasınıñ ğomum särqatibe Luis Almargo da sośial’ media aşa tüntäreleş kereşüenä teläktäşlek kürsätte. “Venesuêla konstituśiyäse häm waqıtlıça däwlät başlığı Xuan Guaydonıñ yanındağı xärbilärne sälamlibez,”-di ul.

 İspaniyä mäğarif ministrı häm xökümät süzçese İsabel Selaya: “Venesuêlada çişeleş tınıç yuldan yasalırğa tiyeş. Hiçber xärbi tüntäreleşne yaqlamıybız,”-dide. Ul ildä qan tügelmäyäçägenä ömetlänüen belderde. Süzçe İspaniyäneñ üzen waqıtlıça däwlät başlığı iğ’lan itkän Xuan Guaydonı tanuın xäterlätte.

“Guaydonı yaqlawnıñ demokratik qarar häm yaxşı fiker buluın uylıybız. Bezneñ öçen Guaydo - Venesuêlada küçeşne täêmin itäçäk qanunlı wäkil,”-dip söyli İsabel Selaya.