G20 sammitı Soğud Ğaräbstanında ütäçäk

G20 liderlar sammitı 2020nçe yılnıñ noyabrendä Soğud Ğaräbstanında uzaçaq. Älege däwlätneñ räsmi xäbär agentlığı SPAda urın alğan xäbärlärgä qarağanda, çara patşa Sälman bin Abdulaziz citäkçelegendä 21nçe-22nçe noyabr’dä Riyadta oyıştırılırğa tiyeş.

Şulay itep, G20 liderlar sammitı täwge tapqır ğaräp däwlätendä ütäçäk. Anda iq’tisadi, ictimağıy, ênergetika, êkologiyä, säwdä häm awıl xucalığı tarmaqlarına qarawçı bik küp mäs’älälär telgä alınır dip kötelä.

G20gä kerüçe däwlätlärdä dön’ya xalqınıñ öçtän ikese yäşi. Ul global’ iq’tisadnıñ 85%ın, dön’yaküläm säwdäneñ 75%ın qulında tota.

G20 - Germaniyä, AQŞ, Argentina, Avstraliyä, Braziliyä, Qutay, İndoneziyä, Franśiyä, Kön’yaq Afrika, Kön’yaq Koreya, Hindstan, Angliyä, İtaliyä, Yaponiyä, Kanada, Meksika, Rusiyä, Soğud Ğaräbstanı, Törkiyä häm Awrupa Berlegennän tora.