Yäşeren qaberlär

Meksikada yäşeren qaberleklärdä 15 cäsäd tabıldı. Ul Verakruz töbägendäge mäydanda. Qaberleklärne wäqalätle zatlar häm yuğalğan keşelärneñ yaqınnarı tarafınnan oyıştırılğan qazınular waqıtında tabalar. Töbäk prokuraturasınnan belderülärençä, yäşeren qaberlärdän 12 keşeneñ qaldıqları çığarılğan. Tağın 3 cäsäd barlığı bilgele. Ämma aları älegä çığarılmağan.

Prokuror Xorxe Vinkler êzläw törkemenä yuğalğan keşelärneñ tuğannarınıñ üz teläkläre belän quşıluın häm Rio Blanko şähärçege tiräsendä tağın bik küp şikle qaber kürenüen belderde. Alarda oyışqan cinayät’çel törkemnärneñ köndäşläre häm qorbannarı kümelgän dip farazlana. Verakruz töbägendä yözlärçä şundıy qaber bar.  

Êçke êşlär ministrlığınıñ keşe xoquqları, migraśiyä häm xalıq sanı buyınça cawaplısı Alexandro Ênsinas äytüençä, uzğan ay başında xökümät ildä urlanğan yäisä yuqqa çıqqan yaqınça 40 meñ keşene tabu häm kemlegen bilgeläw tırışlıqların arttıracağın belderde. Monıñ öçen 20 million dollardan artıq aqça bülenäçäk. İl külämendä şäxese açıqlanmağan 26 meñ cäsäd barlığı açıqlanğan. Räsmi zatlar Meksikanıñ “zur yäşeren qaberlek” xälenä kilüen belderä.