“Rusiyä Venesuêladan çığarğa tiyeş”

Amerika Quşma Ştatları ilbaşı Donal’d Tramp: “Rusiyä Venesuêladan çığarğa tiyeş,”- dip belderde. Ul Mäskäwne bu mäs’älädä täwge tapqır turıdan-turı maqsat itep aldı.  

Tramp Aq Yortta üzen Venesuêlanıñ waqıtlıça ilbaşı iğ’lan itkän Xuan Guaydonıñ xatını belän oçraştı. Fabiana Rosales de Guaydo belän söyläşüdän soñ AQŞ däwlät başlığı jurnalistlarğa belderü yasadı. Ul axırğa qadär Xuan Guaydo häm törkeme yanında bulaçaqların assızıqladı häm anıñ xatınına möräcäğat’ itep: “Bez, AQŞ bularaq, sezneñ belän, Venesuêla xalqı häm Guaydo belän 100% bergä. Venesuêladağı xällär bulırğa tiyeş tügel ide. Ämma bolar tözäteläçäk,”-dide.  

Tramp Venesuêlanıñ, asılında, tabiğıy baylıqları küp bulğan däwlät ikänen häm ildäge problemalarnıñ däwlät başlığı Nikolas Maduro idaräse arqasında çığuın äytte.

AQŞ ilbaşı Rusiyäneñ älege cirlektä buluına borçıluın da sizderde. Mäskäw belän bu mäs’älädä êlemtägä kerü turındağı sorawğa: “Barısın da belälär,”-dip kenä cawap birde. Bilgele bulğança, 24nçe martta Rusiyä saqlanu ministrlığınıñ 2 oçqıçı Venesuêla başqalası Karakas yanına töşep utırdı. Alar belän 100dän artıq xärbi häm 35 tonna mediśina kiräk-yaraqları kiterelüe açıqlandı.

Tramp Maduro idaräseneñ qulında köçle êlementlar bulmawın telgä aldı. “Armiyä tışında alarnıñ tağın da zur basım çarası yuq. Keşelär açlıqtan ülä häm yärdämnärne qabul itmilär. Venesuêla mäs’äläsendä barlıq variantlar östäldä,”-dide ul.

Guaydonıñ xatını Rosales isä ilendäge wäzğıyät’ne tözätü öçen AQŞtan häm Tramptan yärdäm sorawların belderde.