Angliyädä mäktäpkä islamofobik höcüm yasaldı
Yäşüsmerlär binanı yandırırğa mataşa
Angliyädä İslam beleme birüçe ber mäktäpkä höcüm ittelär. Binanıñ täräzälären wattılar, Kor’äni Kärim nösxälären yırtıp tirä-yaqqa attılar. Waqıyğa N’yukasldağı Baxr akademiyäsendä bula
Mäktäp mödire imam Abdul Müxit beldergänçä, alar höcümnän soñ poliśiyä belän mäktäpneñ mäçetenä kerälär häm anda 18 yäş’tän keçkenä 6 yäşüsmerne oçratalar. Här cirgä yanuçı matdä tügelgän bula. “Bez yanğınğa turı kilmädek. Ämma ber keläm yanğan ide. Äyterseñ, här närsäne yandırırğa äzerlängännär. Üz aralarında möselman terroristlar turında söyläşep, rasaçıl şayartular äytkäläşälär ide,”- di ul.
Müxit waqıyğa urınına täwge bulıp barğan törkemdä poliśiyäneñ citärlek bulmawı arqasında 6 şöbhäleneñ qaçuın, ämma soñınnan êläkterelüen belderde. Bu ayda mäktäpkä 3nçe höcüm yasalğan inde. Ul Angliyäneñ tön’yağında islami belem birgän berdänber uqu yortı. Citäkçelek kiläçäktä citdi höcüm yasaluınnan qurqa.
Räsmi mäğ’lümatlarğa qarağanda, Angliyädä rasaçıl häm İslamğa qarşı höcümnär 15nçe martta Yaña Zelandiyädä bulğan terrorçı höcümennän soñ citdi däräcädä arttı.
