Trampnıñ şaw-şu quptarğan belderüe

Amerika Quşma Ştatları däwlät başlığı Donal’d Tramp İzrail tarafınnan basıp alınğan Golan qalqulıqları xaqında bäxäsle belderü yasadı. Ul: “AQŞqa İzrailneñ Golan qalqulıqlarındağı xakimiyäten tulısınça tanu waqıtı citte,”-dide.

Şulay itep, Tramp Twitter xisabında Yaqın Könçığıştağı tınıçlıq häm regiondağı mäs’älälärne cayğa salu nisbätennän yasalaçaq bik ähämiyätle adımnıñ xäbären birde. Ul, monnan tış, Golan qalqulıqlarınıñ İzrail häm regiondağı totrıqlılıq öçen strategik häm iminlek yağınnan kritik ähämiyätkä iyä buluın belderde.  Bilgele bulğança, İzrail Süriyäneñ Golan qalqulıqların 1967nçe yılda basıp aldı.

İzraildä 9nçı aprel’dä bulaçaq irtä saylawlar aldınnan xökümät räise Bin’yamin Netan’yaxu idaräseneñ Vaşingtonnı basıp alınğan Golan qalqulıqların “İzrail cire” bularaq tanuı öçen qıstawı farazlana.

AQŞ däwlät departamentınıñ 13nçe martta çığarğan “2018nçe yıl Keşe xoquqları xisabı”nıñ İzrail öleşendä monnan alda “basıp alınğan” dip sıyfatlanuçı Golan qalqulıqların täwge tapqır “İzrail kontrole astındağı” dip atawı iğ’tibarnı cälep itte.  

Süz uñayınnan, İzrail xökümäte räise Bin’yamin Netan’yaxu AQŞ ilbaşı Donal’d Trampqa, Golan qalqulıqları xaqındağı belderüdän soñ, räxmäten citkerde.