İzrail 6 ğaräp ile belän duslaşqan

İzrail xökümäte räise Binyamin Netan’yaxu äle küptän tügel genä doşman bularaq qabul itelgän 6 islam däwläte belän aralaşuların, ämma monı yäşerülären söyläde. Bu xaqta ul 1967nçe yıldağı “Altı könlek suğış” waqıtında xökümät başında bulğan Levi Êşkol’nı iskä alu tantanasında belderde.

Netan’yaxu älege illärne atamadı, ämma alar belän aralaşunıñ tınıçlıq prośessı öçen ähämiyätle buluın assızıqladı. “Başqa kürşe däwlätlär belän dä kileşü, êlemtä häm mönäsäbätlär tözüdä alğa barış kürenä, tik barısı belän dä tügel,”-dide ul.

Netan’yaxu äytkänçä, İzrail cämäğat’çelege ğaräp illäre belän aralarnıñ rätlänüeneñ barı tik keçkenä öleşen kürä.

Pol’şa başqalası Varşavada 13nçe-14nçe fevral’dä Amerika Quşma Ştatları citäkçelegendä “Yaqın Könçığışta tınıçlıq häm iminlekneñ kiläçägen yaqlaw” konferenśiyäsendä İzrail xökümäte räise Netan’yaxu häm küp kenä ğaräp illärennän yuğarı däräcäle räsmi zatlar qatnaştı.