Hawa pıçraqlığınnan ülüçelär sanı arta
Ul yılda 8 million 800 meñ keşeneñ ülemenä kiterä
Hawa pıçraqlığınnan dönya külämendä yılda 8 million 800 meñ keşeneñ ğomere özelä.
Bu xaqta “European Heart Journal” isemle fän – belem jurnalında dönya kürgän tikşerenü näticälärendä citkerelä.
Tikşerenüçe professor doktor Tomas Münzel :”Tikşerenü näticäläre hawa pıçraqlığınnan ülemnärneñ tämäke tartu belän bäyle ülem oçraqlarınnan küp buluın kürsätä. Bötendönya sälamätlek saqlaw oyışması mäğ’lümatlarına kürä 2015 nçe yılda dönya külämendä 7 million 200 meñ keşe tämäke tartu arqasında yaqtı dönyadan kitte”,-dip belderä.
Tikşerenüçelär hawa pıçraqlığınıñ Awrupada yaqınça 800 meñ keşeneñ irtä ülemenä säbäp buluın äytä. Bu wäzğiyat’ ğomerne urtaça 2 yılğa qısqarta.
Belgeçlär äytüençä, hawa pıçraqlığı iñ berençe çiratta üpkälärgä tiskäre yoğıntı yasıy , qan äyläneşe problemaları kiterep çığarıp yöräk awırularına säbäp bula häm ülem oçraqların arttıra.
Fosil yağulıqlarnı yañartıla ala torğan ênergiya çığanaqları belän almaştıru kiräklegenä basım yasawçı tikşerenüçelär bu räweşle hawa pıçraqlığınıñ keşe ğomerenä täêsire kimiyäçäk dip uylıy.
