İranda matäm

İranda İnqıylab saqçıları armiyäsenä bäyle çik buyı ğaskärlären taşuçı avrobusqa höcüm ittelär. “Canlı bomba” şartlap 27 xärbi ülde, 13e yaralandı. İran däwlät telekanalı xäbärenä qarağanda, waqıyğa Sistan-Belucistan provinśiyäseneñ Zaxidan häm Xaş yulı östendä buldı. Höcüm bomba quyılğan maşina belän yasalğan. Anıñ İzrail küzläw xezmäte yärdäme belän ğamälgä aşırıluın alğa sörälär.

İran räsmi xäbär agentlığı İRNA isä 20 xärbineñ ülüen häm kimendä 20seneñ yaralanuın yaza.

Höcüm öçen cawaplılıqnı “Cäyşu’l Adl” oyışması üz östenä aldı häm waqıyğada avtobustağı 40 xärbineñ barısının ülüen belderde. Moña İran tarafınnan älegä cawap kilmäde.

İran tışqı êşlär ministrı Cävad Zarif Twitterdan höcüm xaqında belderü yasadı. Ul monıñ AQŞtan yärdäm aluçı terrorçı törkemnärneñ êşe buluına törtterde. “İrannıñ “Varşava śirkı” uzğan könne terrorçı höcümenä duçar buluı oçraqlılıq mı? Ayıruça, ber ük terrorçılarnıñ Varşava uramnarında bäyräm itkän häm Twitterdağı yalğan xisaplardan alarğa telärläşlek kürsätelgän waqıtta. Kürengänçä, AQŞ härqwaqıt ber ük yalğışlarnı yasıy, ämma başqa näticä kötä,”-dide ul.  

Pol’şa başqalası Varşavada AQŞ citäkçelegendä İrannıñ töbäktäge êşçänlegenä qağılışlı konferenśiyä ütä. Anda İzrailne xökümät räise Binyamin Netan’yaxu, AQŞnı viśe-prezident Mayk Pens häm däwlät särqatibe Mayk Pompeo wäkillek itä. Cıyılışta küp kenä ğaräp däwlätläre, Franśiyä häm Germaniyä dä qatnaşa.