AQŞ diplomatların kire çaqırdı
Venesuêladağı AQŞ diplomatik wäkilleklärendä êşläwçe qayber xezmätkärlär öyenä qaytıp kitäçäk
Amerika Quşma Ştatlarınıñ däwlät departamentı Venesuêladağı ilçeleklärendä ikençe däräcä wäqalätle xezmätkärlärne ilgä qaytırğa çaqırdı. Berençe däräcä diplomatlar isä êşlären däwam itä.
Kürsätmäne Venesuêladağı AQŞ diplomatik wäkilleklärendä êşläwçe 150 tiräse xezmätkärneñ barısınıñ iminlegen täêmin itü awır buluı öçen birgännär. Räsmi çığanaqlardan alınğan mäğ’lümatlarğa qarağanda, başqala Karakastağı ilçelek açıq qala.
Däwlät departamentı Venesuêlada yäşäwçe AQŞ watandaşlarına kisätü yasap, ildän kitü öçen äzer bulırğa çaqırdı.
İsegezgä töşeräbez, Venesuêla däwlät başlığı Nikolas Maduro kiçä başqala Karakasta Miraflores Sarayı balkonınnan meñnärçä watandaşına möräcäğat’ itte. Ul AQŞnıñ Venesuêlada tüntäreleş yasarğa mataşuı säbäple älege däwlät belän barlıq mönäsäbätlärne tuqtatuın belderde. Maduro Amerika diplomatlarına Venesuêladan kitü öçen 72 säğat’ waqıt birde.
