Yämändä tormış şartları könnän kön naçaraya bara

Yämändä yaqınça 17 million keşe çista su citmäwdän integä häm mediśina xezmätennän faydalana almıy.

Bötendönya sälamätlek saqlaw oyışması Yämändä watandaşlar suğışı kiterep çığarğan keşelek krizisı belän bäyle mäğ’lümatlar urtaqlaştı.

Älege mäğ’lümatlardan kürengänçä, Yämändäge mediśina oyışmalarınıñ 45%ı xezmät kürsätä almıy.

Watandaşlar suğışı kiterep çığarğan tağın ber zur problema – azıq-tölek krizisı,ildä 17 million 800 meñ keşe aç.

 Ozaq waqıt säyäsi totrıqsızlıq xökem sörgän Yämändä husilär belän xökümätkä bäyle köçlär arasında bäreleşlär küzätelä.

İldäge açlıq,xolera,bäreleşlär häm hawa höcümnäre ğadi xalıqqa zur zıyan kiterä.