Bolsonaru ant itte

Braziliyädä yaña saylanğan ilbaşı Jair Bolsonaru ant itep wazıyfasına kereşte. Ul Braziliyä soborınnan Kongress binasına xatını belän bergä öste açıq Rolls-Roys maşinasında kilde. Yulda ul ant itü tantanası öçen cıyılğan teläktäşlären sälamläde.

Tantanada İzrail xökümäte räise Binyamin Netan’yaxu, AQŞ däwlät särqatibe Mayk Pompeo qatnaştı. Çit ildän kilüçe däräcäle qunaqlar arasında, şulay uq,  Vengriyä prem’yerı Viktor Orban häm Portuğaliyä ilbaşı Marselo Rebelo da bar ide.  

Bolsonaru, tantanada çığış yasap, ildä zur üzgäreşlär wäğ’dä itte. Ul barlıq parlament äğ’zaların rişwätçelek häm cinayät’çelek belän köräşergä çaqırdı.

Jair Bolsonaru Braziliyäne qotqaraçaq “Milli pakt” tözergä teläwen häm ilne ideologiyädän çistartaçağın söyläde. Ul “ayırımçılıq häm büleneş bulmağan cämğıyät’ tözü” süze birde.

AQŞ ilbaşı Donal’d Tramp Twitter xisabınnan Braziliyäneñ yaña däwlät başlığın täbrik itte. “AQŞ sineñ yänäşäñdä” dip yazdı ul. Bolsonaru aña üzeneñ Twitter xisabınnan cawap birde. “Xörmätle ilbaşı Donal’d Tramp, qıyulıq birüçe süzläregezdän zur qanäğat’lek aldım. Bergä, Täñreneñ yärdäme belän xalqıbızğa mullıq häm üseş kiteräçäkbez” dip yazdı Braziliyä däwlät başlığı.

Jair Bolsonaru Braziliyädä 28nçe oktyabr’dä uzğan ikençe tur saylawlarda ciñü yawladı. Ul Sośial’ - liberal’ partiyä namzäte ide, çiktän tış unçı bularaq bilgele. Bolsonaru rişwätçelek häm cinayät’çelek belän köräş mäs’äläsendäge fikerläre belän tanıldı.