Franśiyädä protest çaraları

Franśiyäneñ başqalası Parijda  “sarı jiletlılar”nıñ kiçä oyıştırğan çaralarında poliśiyä äçe gaz häm su sipterep qarşılıq kürsätte. Kön däwamında 168 keşe saq astına alındı.

Sıyıq yağulıqqa bäyä artuğa reakśiyä bularaq başlanğan, soñınnan ilbaşı Êmmanuêl’ Makron idaräsenä açu häm fetnägä äwerelgän demonstraśiyälär, xökümätneñ tuqtatırğa çaqırularına qaramastan, il külämendä däwam itä.

Rizasızlar Makronnıñ wäğ’dälären citärlek dip tapmadı. Çaralarnıñ 5nçe atnasında alar qabat Parijda Şanzêlize uramı häm Opera mäydanında cıyıldı. Sannarı ütkän atnalardağıdan azrak. Poliśiyä belän protestçılar arasında bik yış kiyerenke mizgellär bulıp aldı. İrtänge säğat’lärdäge ilk qatışudan soñ qatnaşuçılar Şanzêlize tiräsendäge uramnarğa taraldı. Alar poliśiyägä taş attı, ike arada bäreleşlär kilep çıqtı. Ber protestçınıñ küze yaralandı. Aña tärtip saqçıları atqan äçe gaz kapsulası kilep tigän.  Yaralını aşığıç yärdäm xastaxanägä alıp kitte.