Meksika-AQŞ çigendä bala ülde
Ul migrant konvoyı belän Üzäk Amerikadan kilgän bulğan
Üzäk Amerikadan kilgän migrant konvoyında urın alğan gvatemalalı qız bala Meksika -AQŞ çigendä wafat buldı.
Vaşington Post xäbär itkänçä, 7 yäş’lek kız uzğan atnada ätise belän qanunsız räweştä Amerika tarafına ütep kergän. Saq astına alınıp berniçä säğat’ uzğannan soñ anıñ ğomere özelä. Balanıñ ülem säbäbe - çiktän tış su yuğaltu näticäsendä yörägeneñ kisäk tuqtawı. Çik buyı saqçılarınıñ süzlärenä nigezlängän xäbärdä äytelgänçä, keçkenä qız ällä-niçä kön aç häm susız torğan.
AQŞ idaräse älegä balanıñ üleme belän bäyle belderü yasamadı.
Üzäk Amerikadan AQŞqa kitü öçen yulğa çıqqan 7 meñnän artıq keşelek migrant konvoyı uzğan ayda Meksikanıñ çik buyı şähäre Tixuanağa barıp citte. Bu keşelär Gvatemala, Gonduras häm Salvadordan xäyerçelek, dähşät häm zolımnan qaçıp kilülären belderä. Kübeseneñ maqsatı - qulğa alınaçaqları turındağı kisätügä qaramastan, AQŞqa ütep kerü.
Çik buyı saqçıları uzğan ay qanunsız räweştä Amerikağa kerergä mataşuçı, aralarında balalar da bulğan, qaçaqlarğa küz yäşen çığaruçı gaz belän qarşılıq kürsätte.
AQŞ ilbaşı Donal’d Tramp migrant konvoyındağı beräwneñ dä, mäxkämä qararınnan başqa, ilgä kermäyäçägen belderde.
Bäyläneşle xäbärlär
"Qayberläre tereläy kümelgän"
"Xamas" Nasır xastaxanäsendäge kümäk qaberlekne tikşerü öçen yärdäm sorıy
