Däyrizorda bäreleşlär

Amerika Quşma Ştatları citäkçelegendäge koaliśiyä köçläre Süriyäneñ könçığışındağı Däyrizornıñ Käşmä rayonına hawadan höcüm itte. Anda ber ük ğailädän bulğan 15 keşeneñ ğomere özelde.

Koaliśiyä DEAŞ terrorçılıq oyışması belän köräş sıltawı belän Däyrizor töbägendäge toraq punktlarğa höcüm yasıy. Anda yış qına ğadi xalıqqa zarar kilä.

Sonğı oçraq kiçä kiçke säğat’lärdä bula. Däyrizordağı cirle çığanaqlardan alınğan mäğ’lümatlarğa qarağanda, koaliśiyä köçläreneñ xärbi oçqıçları DEAŞ qulındağı awıllarnı bombalıy. Xäccin üzägeneñ tön’yağındağı Xavvama mäxälläsendä YPG/PKK belän DEAŞ arasında bäreleşlär däwam itüen belderälär. Ul şimbä könne ük başlanğan ide. YPG/PKK terrorçıları rayon üzägendäge noqtalarınnan alğa bara. Alar suğışa-suğışa xastaxanä yanındağı bazar ciren qulğa töşerä.

Koaliśiyä köçläre terror oyışması DEAŞnı toraq punkttan qısrıqlap çığaru öçen başqa terrorçı oyışma YPG/PKKğa cirdän häm hawadan yärdäm kürsätä. Alar isä Färat yılğasınıñ könçığışındağı Däyrizornıñ könçığış häm könbatış cirleklären basıp alunı däwam itä. Däyrizornıñ tağın ber öleşendä isä Bäşşar Äsäd rejimı köçläre xakimlek itä.

Süriyä mäydanınıñ yaqınça 28%ın YPG/PKK basıp alğan bulsa, DEAŞ terrorçı oyışması isä 3%ın qulında tota.