145 kit yarda ülde

Yaña Zelandiyäneñ Styuart utrawı qomlığında 145 pilot kit ülde. Älege zur balıqlar yarğa üzläre taşlanğan häm kire diñgezgä kerä almağan.

Yaña Zelandiyä tabiğat’ne saqlaw idaräse tarafınnan yasalğan belderüdä äytelgänçä, kitlarnıñ yarğa çığu säbäpläre bilgele tügel. Tabiğat’ saqçıları balıqlarnı kürep alğanda alarnıñ kübese ülgän bula. İsän qalğannarın da qotqara almıylar. Belgeçlär alarnı êvtanaziyä belän yoqlatırğa mäcbür bula. “Qızğanıçqa, qalğan kitlarnı yañadan yözderü mömkinlege bik tübän ide,”-di qotqaru törkemendägelär.

Yaña Zelandiyä yarlarında kitlarnıñ yarğa çığıp ülü oçraqları yış bula. Monıñ säbäben tögäl genä äytä almıylar. Ämma kitlarnı bu adımğa êtärüçe qayber faktorlar bilgele. Alar arasında balıqlarnıñ yünäleşlären yuğaltuı, diñgezlärdäge geografik üzençäleklär, sularnıñ tiz arada artıp kimüe, berär awçı tarafınnan qualanuları, kitlarnıñ awlaw waqıtında saylıqqa kerüläre, törkemnärendäge awıru balıqnı saqlarğa tırışuları yäisä awır hawa şartları bar.

Yaña Zelandiyäneñ Kön’yaq utrawındağı Altın qultıq qomlığına 2017nçe yılnıñ fevralendä 450 pilot kit çıqqan ide. Alarnıñ 70%ı ülde. 2009nçı yılda Çatem utrawları yanında da 100dän artıq pilot kit hälaq buldı.