Kaliforniyädäge yanğın ğalämnän kürenä
NASA üzeneñ internet säxifäsendä afät urınnarınıñ iyärçennän töşerelgän räsemnären bastırdı
Amerika Quşma Ştatlarınıñ Kaliforniya ştatında däwam itüçe urman yanğınnarında ülüçelär sanı 31gä citte. Butte rayonı şerifı Kori Xonea matbuğat cıyılışında beldergänçä, ut êçendä qalğan Paradays şähärçege yanında tağın 6 cansız gäwdä tabılğan. Ul, şulay uq, 228 keşedän xäbär bulmawın söyläde.
Cil yärdämendä ut cäyelüen däwam itä. Yanğın yaqınça 450 kvadrat kilometr mäydannı çolğap aldı. Bu Kaliforniyä tarixında iñ küp ülemgä kitergän ut afäte bularaq terkälde.
Yanğında Paradays şähärçegen dä kertep barlığı 7 meñ qorılma zarar kürde.
Şul uq waqıtta, kön’yaqta Malibu şähären dä yanğınnar çolğadı. Ştat külämendä barlığı 300 meñ keşene êvakuaśiyäläw qararı çığarıldı.
NASA üzeneñ internet säxifäsendä Kaliforniyädäge yanğınnarnıñ iyärçennän töşerelgän räsemnären bastırdı. Andağı töten xätta ğalämnän dä kürenä.
