Yämändä här 10 minut sayın 1 bala ülä

Yämändä 10 minut sayın 1 bala xastalıqlardan ülep kitä. Belgeçlär monıñ buldırmıy qalırğa mömkin awırular ikänen assızıqlıy.

BMOnıñ balalarğa yärdäm fondı Yaqın Könçığış häm Tön’yaq Afrika direktorı Xayrat Kalabari Yordaniyäneñ başqalası Ammanda uzğan matbuğat cıyılışında Yämändäge keşelek draması turında söyläde. Ul ilneñ êçendäge naçar sälamätlek şartlarına basım yasadı. Kalabari: “Yämän bügen balalarnıñ cähännäme,”-dip belderde.  Ul bu wäzğıyät’neñ ildäge barlıq balalarğa da qağıluın äytä. “Här yıl 5 yäş’tän keçkenä 30 meñ balanıñ ğomere özelä. Naçar tuqlanuğa çik quyılsa bu ülemnär tuqtatıla ala,”-di Kalabari.  Xäzerge waqıtta Yämändä 1 million 800 meñ bala açlıq ğazabı kiçerä. Alarnıñ 400 mene ülem tırnağında. İn naçar wäzğıyät’ Xudäydä şähärendä. Açlıqtan ülär däräcägä citkän balalarnıñ 40%ı anda yäşi.  

Kalabari Yämändä suğışuçı taraflarğa möräcäğat’ itep, gumanitar yärdämnärne iltüdä qıyınlıqlar tudırmawların, şartsız-terkäwsez barırğa röxsät itülären häm ğadi xalıqnı saqlawların soradı.

Yämändä inde küptännän totrıqsızlıq xökem sörä. Xusilär xakimiyätne bärep töşerep 2014nçe yılnıñ sentyabr’ ayınnan birle başqala Sana häm qayber başqa töbäklärne kontrol’dä tota. Bik küp şähärlärdä xärbilär belän bäreleş bula. 2015nçe yılnın martınnan Yämän xökümätenä Soğud Ğaräbstanı citäkçelegendäge koaliśiyä köçläre yärdäm itä. Bu wäzğıyät’tä ildäge gumanitar xäl tağın da naçaraydı. Çista su, azıq-tölek citmäw, darular bulmaw säbäple xolera häm başqa bik küp awırtu oçraqları könnän -kön arta.