Bombalı paketlarnı cibärüçe - Trampnıñ tarafdarı

Amerika Quşma Ştatlarında êlekkege ilbaşları, senatorlar, matbuğat oyışmalarına bombalı paketlar cibärüdä şöbhälänep qulğa alınuçınıñ iseme bilgele. Ul Florida ştatınıñ Aventura töbägendä yäşäwçe 56 yäş’lek Śezar’ Altiyeri Sayok ( Цезарь Алтиери Сайок) bulıp çıqtı. Ul Cömhüriyätçe partiyäsendä äğ’za bulıp tora. Sayok internettağı sośial’ çeltärlärdä Donal’d Tramp yaqlı fikerlären belderä. Monnan tış, anıñ yazmaları liberal’lärgä qarşı näfrät belän tulğan.

Sayoknıñ ber maşina quyu urınında mikroavtobusın da taptılar. Anıñ östendä küp sanda AQŞ ilbaşı Donal’d Trampnıñ fotoları häm Amerika bayrağı buluı üğ’tibarnı cälep itä.

Älege şäxes küp tapqırlar cawaplılıqqa tartılğan. Täwgesendä 1991nçe yılda 29 yäşendä qaraqlıqta ğayeplänep mäxkämä qarşına çığa. Şunnan soñğı yıllarda urlaw, narkotiklar taratu, yulbasarlıq şikelle cinayät’lärdä totıla. Sayok 2002nçe yılda Floridadağı ber êlektr ênergiyäse çığaru üzägenä şaltıratıp, utnı kissälär, älege üzäkne şartlataçağın häm monıñ 11nçe sentyabr’däge terrorçılıq waqıyğasınnan da naçar bulacağın beldergän.  

Sayoknı êläktergännän soñ AQŞ yustiśiyä ministrı Djeff Sessions matbuğat çaralarına belderü yasadı. Ul älege şäxesneñ “şartlatuçı matdä cibärü”, “êlekkege ilbaşlarına yanaw” şikelle 5 törle cinayät’tä ğayeplänüe häm bolar isbatlansa 58 yılğa räşätkä artına kerü mömkinlegen söyläde.      

AQŞnıñ kön üzägendä bulğan şöbhäle paketlarnıñ soñğı punktı Kaliforniya senatorı Kamala Xarris häm milliarder Tom Steyer buldı. Alarnıñ ikesen dä poçta bülekçäsendä ük açıqlap poliśiyägä tapşıralar.

Şöbhäle paketlar ber atna êçendä AQŞnın êlekkege ilbaşları Barak Obama, Bill Klinton, tağın berniçä êlekkege säyäsätçe häm CNNnıñ N’yu-York ofisına cibärelde. Alarnın êçennän “torba bombası” iseme birelgän şartlatuçı caylanma çıqtı.