“N’yu-York Tayms” gazetı Qaşıqçı waqıyğasındağı ber şäxesne açıqladı
Ul Soğud Ğaräbstanı täxet prinśı Möxämmät bin Sälmanğa yaqın bulğan şäxes
Soğud Ğaräbstanı täxet prinśı Möxämmät bin Sälmanğa yaqın bulğan şäxes Maxär Abdulaziz Muträb 2nçe oktyabr’dä Cämal Qaşıqçıdan berniçä säğat’ êlek İstanbuldağı konsullıqqa kergän bulğan. Monı dälilläwçe fotolar Amerikanıñ “N’yu-York Tayms” gazetında basıldı.
Xäbärdä, şulay uq, Muträbneñ könneñ däwamında Soğud Ğaräbstanı konsulı Möxämmät äl-Utäybineñ öyeneñ qarşında basıp toruın, ber qunaqxanädän qulında zur çemodan belän çığuın häm Atatörk aêroportı aşa Törkiyädän kitüen kürsätkän fotolar da urın ala. Yazma avtorları alarnı yabıq konturlı televideniye sistemaları aşa qulğa töşerülären belderä. Anda kürengänçä, şöbhäle şäxes Törkiyä waqıtı belän irtänge säğat’ 10 tularğa 5 minutta konsullıqqa kerä. 16 tulıp 45 minutta ul konsulnıñ öyeneñ qarşında kürenä. Muträb 17 tulıp 15 minutta tuqtalğan qunaqxanäsennän çığa häm 17:58dä ul aêroportta.
“N’yu-York Tayms” gazetı Maxär Abdulaziz Muträbneñ 2017nçe yılda Soğud Ğaräbstanınıñ London ilçelegenä bilgelängän diplomat buluın häm ilneñ täxet prinśı belän saqçısı şikelle küp cirgä säfär itüen dä açıqladı.
“Vaşington Post” gazetına mäqalälär yazuçı jurnalist Cämal Qaşıqçı 2nçe oktyabr’ könne räsmi êşlär öçen Soğud Ğaräbstanınıñ İstanbuldağı konsullığına kerde häm şunnan son yuqqa çıqtı.
