İndoneziyadağı cir teträwdä ülüçelär arttı

İndoneziyäneñ Sulawesi utrawında comğa könne bulğan 7,4 zurlığındağı cir teträw häm şunnan soñ barlıqqa kilgän śunami näticäsendä ülüçelärneñ sanı 1203kä citte.

Cirle mediyada urın alğan xäbärlärgä qarağanda, xökümät töbäk xalqına kibetlärdän buşlay azıq-tölek alırğa mömkin buluın häm monıñ däwlät tarafınnan tülänäçägen belderde.   

Hälakättän soñ Urta Sulawesi töbägendä 28nçe sentyabr’dän 11nçe oktyabr’gä qadär ğadättän tış xäl iğ’lan itelde.

Cimereklär astındağı küp kenä mäyetlärne äle xaman çığarıp beterä almağannar. Şuña kürä terkälgän ülüçe sannarı artırğa mömkin.

Wäqalätle zatlar ildäge śunami kisätü sistemasınıñ 2012nçe yıldan birle êşlämäwen belderde. İndoneziyä öçen bu cihaz bik ähämiyätle. Anıñ yärdämendä tabiğıy qaza turında aldan uq xäbär birelä häm ülüçelär sanın kimetü mömkin bula.

Paludağı cir teträw häm śunamida ğomere özelüçelär öçen kimendä 300 cäsät öçen kümäk qaberlek qazıldı. Ğomumi cenazanıñ qayçan bulacağı älegä bilgele tügel. Läkin wäqalätle zatlar dini säbäplär arqasında ülüçelärneñ tizräk kümelüen teli.