İndoneziyadağı cir teträwdä ğomere özelüçelär

İndoneziyada yäkşämbe könne bulğan cir teträwdä ğomere özelüçelärneñ sanı 98gä citte. Bu xaqta Tabiğıy afät belän idarä itü milli agentlığınnan belderdelär. Lombok utrawındağı 7 ball däräcäsendäge cir teträwdä 236 keşeneñ yaralanuın da belderälär. 20 meñ keşene isä imin urınnarğa küçerergä turı kilä. Töbäk turizm üzäkläreneñ berse buluğa qaramastan, ülüçe häm yaralanuçılarnıñ barısı da indoneziyalı.

Töbäktä, bigräk tä awıl cirleklärendä, êzläw-qotqaru êşläre däwam itä. Ämma qayber yullar häm küperlär zarar kürgän. Şunıñ öçen barlıq poçmaqlarğa ireşü qıyınlıq tudıra.  

Cir teträwdän soñ bügengä qadär tağın 200gä yaqın selkenü terkälgän. Meteorloglar śunami kisätüe dä yasağan ide. Kiçä anı ğamäldän çığardılar.

İndoneziyada uzğan atnada şul uq töbäktä 6,4 ball däräcäsendä cir teträw bulğan ide. Anda 16 keşeneñ ğomere özelde.