Venesuêla däwlät başlığı Nikolas Maduroğa höcüm

Venesuêla däwlät başlığı Nikolas Maduroğa başqala Karakastağı tantanada çığış yasağan waqıtta şartlatuçı tutıralğan dronnar belän höcüm yasaldı. BiBiSi anıñ yaralanmawın xäbär itä. Êlemtä ministrı Yorgi Rodrigez beldergänçä, höcümneñ maqsatı Maduro bulğan häm anda 7 xärbi yaralanğan.

Maduro höcümnän soñ xalıqqa möräcäğat’ itte.  “Bu mine üterergä kereşü ide,”-dide ul. Anıñ äytüençä, xäzergä qadär cıyılğan dälillär höcümne uñçı êkstremistlar yasawın kürsätä. Höcümçelärneñ Boğota häm Mayami belän êlemtädä buluı da açıqlanğan.   

“Ğomeremne özärgä tırışqan höcüm öçen cawaplılarnıñ qayberläre êläkterelde,”-dip belderde Maduro. Älege şäxeslär turında ul başqa mäğ’lümat birmäde.

Venesuêlo milli assambleyası räise Diosdado Kabel’o Twitter säxifäsendä waqıyğanı “terrorçılıq höcüme” bularaq bäyäläde. “Saylawlarda ciñä almağan uñçılar massaküläm çaralarda dähşät çäçüen däwam itä,”-dide ul.

Şul uq waqıtta, üzlären “Futbolka kigän ğaskärlär” dip atawçı törkem höcümne üz öslärenä aluların Twitter aşa belderde.

Moña qadär iseme işetelmägän älege törkem xaqında başqa mäğ’lümat birelmäde.