Greśiyädäge yanğınnar ut törtü näticäseme?

Greśiyä ictimağıy qurqınıçsızlıq häm grajdannar saqlanu ministrı wäkile Nikos Toskas Afina yanındağı toraq punktlarda bulğan yanğın xaqında belderü yasadı. “Maxsus xezmätlär tarafınnan yasalğan tikşerülärgä qarağanda, ut törtü häm başqa cinayät’lärgä işarätläwçe citdi dälillär bar,”-dide ul.

Toskas häm Greśiya xökümäte süzçese Dimitris Canakopoulos 80dän artıq keşeneñ ülemenä kitergän faciğadan soñ jurnalistlar belän oçraştı. Anda poliśiyä häm yanğın sünderü xezmätläreneñ citäkçeläre dä qatnaştı.   

Toskas cawaplılarnıñ xataların tabu öçen citdi tırışlıq quyuların belderde. “Min idarädä zur xata kürmädem. Yuğaltularıbız zur, barıbıznı tetränderde. Ämma bu qadär awırlıq häm yuğaltu xälendä wäzğıyät’ne qulda totu köç sorıy,”-dide ul.

Toskas Greśiyä xökümäte räise Aleksis Śipraşqa êştän kitü turındağı ğarizasın birüen äytte. “Vöcdanlılıq yözennän ğarizamnı prem’yerğa kerttem, ämma köräş waqıtında taşlap kitü döres bulmawın belderep qabul itmäde,”-dide ul.

Canakopoulos iyärçennän alınğan küreneşlärgä qadär tikşerelep, yanğınnıñ kilep çığu säbäpläre belän bäyle barlıq mäğ’lümatnıñ tuplanuın söyläde. Xökümät räise quşuı buyınça, alarnı xoquqıy organnarğa tapşırğannar.  

Berlektäş illärdän yanğın başlanğan säğat’ häm urındağı iyärçen küreneşlären taläp itkännär. “Yanğınnıñ tögäl bularaq qayda başlanuın kürsätüçe mäğ’lümatlarnı xezmätlärebez uñayladı. Tikşerü başlandı,”- dide Canakopoulos.