Paqıstanda saylaw häm höcüm

Paqıstanda 105 millionnan artıq saylawçı ildä 5 yıl qanun çığaru êşen başqaraçaq Milli parlament häm töbäk parlamentları öçen tawış birä başladı. Cirle waqıt belän säğat’ 8dä xalıq ärcälär yanına aşıqtı. Watandaşlar tar töbäk sisteması nigezendä idarä itelüçe däwlättä üz cirleklärendä yarışuçı kandidatlar arasınnan saylıy. İl külämendä 85 meñnän artıq saylaw ärcäse quyılğan.

Xökümätne töziyäçäk prem’yer-ministrnı da Milli parlament äğ’zaları arasınnan saylayaçaqlar. 849 urın öçen barlığı 12 meñläp kandidat yarışa. Alarnıñ 577 cirle zakon çığaru organnarına, 272se Milli parlamentqa saylanaçaq. 100dän artıq partiyä häm ittifaq’ tawış birüdä qatnaşırğa xaq qazanğan.  

Anketalawğa qarağanda, saylaw törmädäge êlekkege xökümät räise Navaz Särifneñ partiyäse Paqıstan möselman ligası - Navaz belän İmran Xannıñ firqase Paqıstan Ğadellek xäräkäte arasında bara.

Milli möselman ligasınıñ kandidatı Faysal Nädim saylaw ofisına yasalğan qul bombası höcümendä yaralandı. Bu kemlege bilgesez keşelär tarafınnan tawış birü başlanırğa berniçä säğat’ qala êşlände. Kandidat häm anıñ maşina yörtüçese yaralı xäldä xastaxanägä kiterelde. Höcüm itüçelärne êzlilär.

Monna tış, Paqıstannıñ könbatışındağı Kettada tawış birergä kilüçelärgä höcüm buldı. Anda 25 keşe ülde. Bu “canlı bomba” bula. Höcümçe saylawçılar arasına kerep üzen şartlata. Waqıyğada yaralanuçılar da şaqtıy. Berençel mäğ’lümatlar buyınça, 40 keşe.