Laosta 6 awıl su astına kümelep qaldı

Laosta böyä işelü näticäsendä su astında qalğan 6 awılda kimendä 20 keşe ülde, 100dän artığı yuğaldı. Tözeleş xälendäge böyäneñ terätüçe divarı tönlä cimerelgän. Anda tuplanğan 5 milliard litr su taşqını 1300dän artıq ğailäne yort-cirsez qaldırdı.

Böyäneñ tözeleşe 2013nçe yılda başlandı häm kiläse yılğa ul ğamälgä keräçäk ide. Gidroêlektr böyäseneñ cimerelü säbäpläre älegä bilgele tügel. Proyektnıñ urtağı Kön’yaq Koreya injenerlıq häm tözeleş şirkätennän ber süzçe beldergänçä, ob’yektnıñ “kötelmägän köçle yañğırlar” säbäple işelüe farazlana.

Qaza urınında êzläw-qotqaru törkemnäreneñ êşläre däwam itä. Cirle wäqalätle zatlar yortsız qaluçılar öçen azıq-tölek häm daru yärdäme yasarğa çaqırdı.

Cimerelgän böyä, ğamälgä kergännän soñ, citeştergän êlektr ênergiyäseneñ 90%ın Tailandqa birü planlaştırılğan. Anı Kön’yaq Koreya, Tailand häm Laos şirkätläre urtaqlığı tözi.