Ğıyraqta rizasızlıq çaraları

Ğıyraqnıñ Näcäf şähärendä êşsezlek, xezmät kürsätü tübänlege häm êlektr utın özülärgä qarşı oyıştırılğan rizasızlıq çaralarında tağın ber keşe ülde. Sälamätlek saqlaw ministrlığınnan belderülärençä, il külämendä älege çaralarda yaralanğan 45 keşedän kübese Bagdad, Divaniya häm Zi Kar töbäklärendä xezmät itüçe iminlek saqçıları.  

Ğıyraqnıñ Keşe xoquqları komissariatınnan äytülärençä, Babil häm Vasıt rayonnarındağı çaralardan soñ qulğa alınğan 203 keşene cibärgännär.

Divaniyä ilendä kiçä iminlek köçläre Şiğıy Bädir oyışmasınıñ binası qarşında cıyılğan demonstrantlarnı taratu öçen ut açqan. Näticädä anda qatnaşuçı ber keşeneñ ğomere özelüen belderdelär.

İlneñ kön’yaq ölkälärendä êşsezlek mäs’äläse belän başlanğan rizasızlıq çaraları, ut özülär dä kilep quşılğaç, tağın da kiñräk cäyelde. Basra, Musenna, Zikar, Mäysan häm Näcäftän soñ çaralar başqala Bagdadqa da “çäçräde”.

Ğıyraq iminlek köçläre rizasıslarnı bastıru öçen qaywaqıt çın yädrälär belän qarşılıq kürsätä. Näticädä xäzergä qadär 8 keşeneñ ğomere özelde, yözlärçä keşe yaralandı.