İtaliya sıyınuçılarnı yarğa çığarmıy

Liviyä sulıqlarında qotqarılıp, İtaliya yar buyı iminlege komandalığı köymäse belän Siśiliyäneñ Trapani portına kiterelgän 67 sıyınuçınıñ cirgä çığuına röxsät itmilär. Bu xaqta cirle çığanaqlar xäbär itä. İtaliya xökümät räise yärdämçese häm êçke êşlär ministrı Matteo Salvini: “Närsä buluı açıqlanmıyça, berkemneñ dä köymädän töşüenä röxsät itmäyäçäkmen. Ägär berärse minem urınğa monı êşläsä, cawaplılıqnı üz östenä alaçaq,”-dide.

Sıyınuçılarnıñ qayberläre üzlären qotqarğan şäxsi ital’yan köymäse komandasına üterü belän yanağan digän süzlär bar. Moña qarşı Sal’vini: “Ägär köymä komandalığı höcüm yäki yanaw turında yalğan söylägän bulsa, monıñ öçen cawap biräçäk. Çınlap ta andıy xäl bulsa, ğayeplelär törmägä keräçäk,”-dide.

Sıyınuçılarnı diñgezdän ber şäxsi köymä qotqardı. Soñınnan alarnıñ qayberläreneñ üzlärenä yanawların säbäp itep kürsätep, migrantlarnı İtaliya yar buyı iminlege komandalığına tapşırdılar. Köymä kiçä sıyınuçılarnı cirdägelärgä täslim itü öçen portqa kilde. Ämma aña yaqınlaşırğa röxsät itmädelär. Monı sıyınuçılar arasında qaçaqçılar, yäğ’ni qaçaqlarnı Liviyädän Awrupağa taşuçı keşelär bulu mömkinlege belän añlatalar. Xökümät höcüm itüçe häm yanawçılarnıñ kemnär buluın açıqlaw qararı aldı.