Xudäydädän qaçuçılarnıñ sanı 121 meñnän arttı
Xudäydädä soñğı berniçä köndä öleşçä tınıçlıqnıñ artınnan aêroport häm Sanağa kitüçe yul yanında hawa höcümnäre buldı
Yämänneñ Xudäydä şähärendä bulğan bäreleşlärdän qaçıp imin urınnarğa sıyınuçılarnıñ sanı 121 meñnän arttı. Bu xaqta BMOnıñ gumanitar êşlärne koordinaśiyäläw bülege xisabında äytelä. Anda küçenüneñ däwam itüe häm sannıñ kön sayın artuı assızıqlana. Xisapta 10 meñnän artıq ğailägä, ä bu yaqınça 80 meñ keşe, azıq-tölek häm aşığıç yärdäm kiräk-yaraqları taratıluı turında äytelä.
Xudäydädä soñğı berniçä köndä öleşçä tınıçlıqnıñ artınnan aêroport häm Sanağa kitüçe yul yanında hawa höcümnäre buldı.
Xisapta gumanitar yärdäm tarmağında êşläwçelärneñ Xudäydädä buluı häm konvoylarnıñ bik zur qıyınlıqlar kürmiçä şähärgä kerep-çığuları belderelä. Ämma andağı yullarnıñ kübesennän ütärlek tügel, başqa cirlärgä yärdäm iltü öçen aldan söyläşülär alıp baru kiräk.
Xisapta yazılğança, migraśiyä säbäple uquçılarnıñ yartısı ğına mäktäpkä yöri. Şähär êçendä dä bik küp yämänleneñ yäşäw urının üzgärtüe açıqlanğan. Ämma alar urnaşqan töbäklärgä baru, qurqınıçsızlıq şartları bulmaw säbäple, mömkin tügel.
