Ğazzädä comğa çarası ülemgä kiterde

İzrail’ xärbiläre tağın 2 fälästinlene şähit itte. Alarnıñ berse bala. Ğazzä sälamätlek saqlaw ministrlığı süzçese Äşräf äl-Kudra beldergänçä, Xan Yunus häm Räfax şähärläreneñ könçığışında uzuçı “Böyek Qaytu yöreşe” çaralarında qatnaşuçılarğa çın yädrä häm küz yäşe çığaruçı gaz belän höcüm itkännär. Anda 13 yäş’lek Yasar Äbu Alnaca isemle balanıñ başı yaralana häm ul ülä. Monnan tış, 24 yäş’lek yeget Möxämmät Fäwzi äl-Xamayidäneñ êçenä häm ayağına İzrail’ tarafınnan kilgän yädrä tiyä. Ul da şähit.

Äşräf äl-Kudra tağın 310 keşeneñ yaralanuın xäbär itte. Alarnıñ 3se aşığıç yärdäm xezmätkäre, 6sı bala. Yaralanuçılarnıñ 3se bik awır xäldä.

30 marttan birle baruçı “Böyek Qaytu yöreşe” çaralarında şähit bulğan fälästinlelärneñ sanı 135kä citte. Xamas İzrail’ idaräsen 13 yäş’lek Alnacanı beläräk üterüdä ğayepläde. Alar bu cinayät’ne Xalıqara caza mäxkämäsendä xökem itärgä çaqırdı.  

“Ğazzädän könbatış Yordanğa qan häm yazmış urtaqlığı” isemle comğa çarasına, İzrail’neñ çamasız köç qullanuına qaramastan, meñnärçä fälästinle kilde. Bu “Böyek Qaytu yöreşe” qısalarında 14nçe comğa ide. Xalıq sörelgän cirlärenä kire qaytırğa röxsät häm 2006nçı yıldan birle Ğazzägä qarata ğamälgä aşırılğan xaqsız qamalışnıñ beterelüen taläp itä. İzrail’ armiyäse isä tınıç çaralarda qatnaşuçılarğa çın yädrälär belän ut aça.