Tarixi oçraşu tormışqa aştı

Bötendön’ya kötkän sammit Singapurda tormışqa aştı. AQŞ ilbaşı Donal’d Tramp häm Tön’yaq Koreya liderı Kim Çen-ın oçraştı. Küreşü Sentosa utrawındağı Kapello otelendä uza.

Sammit cirle waqıt belän säğat’ 9da tarixi qul qısışu belän başlandı.

Liderlar oçraşuğa qadär jurnalistlarğa qısqa belderü yasadı. AQŞ ilbaşı Tramp: “Oçraşu uñışlı bulaçaq. Böyek ğorurlıq xis itam. Mönäsäbätlärebez iskitkeç bulacağına ışanam,”-dide.

Koreya liderı Kim Çen da: “Monda bulu bik äybät. Ütkändäge yalğış mönäsäbät häm uylarıbız bezneñ qarşıbızğa kirtälär quydı. Ul kirtälärdän üttek häm bügen bez monda,”-dip söyläde.

Şunnan soñ ike lider küzgä-küz oçraşuğa kiçte. Ul yaqınça 45 minut bardı. Bu oçraşuda däwlät başlıqlarınıñ yanında tärcemäçelär genä bar ide. Şunnan soñ liderlar söyläşüdän tuğan xisläre belän urtaqlaştı. Donal’d Tramp oçraşunıñ bik yaxşı ütüen häm mönäsäbätlärneñ iskitkeç buluın assızıqladı. Tön’yaq Koreya liderı Kim Çen-ın isä: “Monda açıq fikerlär belän kildek. Sezneñ belän oçraşuıbız uñışlı bulaçaq,”-dip belderde.

Şunnan soñ delegaśiyälär arasında söyläşülär başlandı.

Ul tögällänğäç, Tramp belän Kim ike il arasında külämle kileşü imzaladı. Dokument iminlek garantiyälären täêmin itä. Anıñ belän Tön’yaq Koreya atom-töş qorallardan bötenläy waz kiçü burıçı ala. Dokumentta, şulay uq, şke däwlät arasındağı mönäsäbätlär dä açıqlana.

Tramp Tön’yaq Koreya liderı Kimnı Aq Yortqa çaqıraçağın häm atom-töş qoralınnan çistartu prośessınıñ tağın da tizräk başlanacağın belderde.