AQŞ oçqıçı Yaponiyada kilep töşte

AQŞ hawa quätläreneñ F-15 tibındağı xärbi oçqıçı Yaponiyanıñ kön’yağındağı Okinava utrawı sulıqlarına kilep töşte.

Oçqıç utrawdağı Kadena aviaśiya bazasınnan kütärelep, 80 kilometr oçqannan soñ, qazağa oçrıy. Oçuçı paraşyut belän sikerep isän qala. Anı Yaponiya qotqaruçıları tabıp ala. Oçuçınıñ xäle yaxşı. Qaza ğadäti öyränülär waqıtında kilep çığa.  

Yaponiya räsmi dairäläre soñğı yıllarda Amerika bazaları tiräsendä oçqıç häm boralaq qazalarınıñ artuına, monıñ watandaşlarnıñ tormışına qurqınıç tudıruına borçıluların belderde.

Saqlanu ministrı İtsunori Onodera kiräkle iminlek çaraları kürelsen häm oxşaş oçraqlar qabatlanmasın öçen AQŞ armiyäsenä kisätü yasadı.

Okinava gubernatorı Takeşi Onaga da: “Mondıy xällär ğadäti küreneşkä äwerelsä, bez balalarıbız häm alarnıñ balaları qarşındağı cawaplılıqnı cirenä citkermägän bulaçaqbız. Alğa kitkän illärdä mondıy probleması bulğan başqa il yuqtır,”-dide.

Okinava utrawında küp sanda AQŞ xärbiläre bar. Soñğı yıllarda anda oçqıç häm boralaq qazaları yışaydı. Uzğan yıl ğıynvar ayında Nağo sulıqlarında MV-22 Osprey tibındağı boralaq oçqıçı suğa kilep töşkän ide, oktyabr’ ayında isä  CH-53E tibındağı xezmätkär yörtüçe boralaqqa Higaşi tirälärendä toraq punktqa töşep utırğanda ut qaptı.