Tunista köymä faciğase

Tunis sulıqlarında qaçaqlar taşuçı köymä batu näticäsendä kimendä 100 keşenen ğomere özelde. Xalıqara migraśiya oyışmasınnan belderülärençä, qaza Sfaks şähäre yanında bula. Zakonsız qaçaqlar taşuçı köymägä tiyeşennän küpkä artıq – 180 keşe utırğan. Alar Awrupağa baru öçen yulğa çıqqan. Köymä batqannan soñ 68 keşene qotqaralar. Alarnıñ 60ı Tunis watandaşı. Qalğannar Marokko, Liviya, Mali, Kamerun häm Kot-d’İvuardan.

Qaçaqlarnıñ Awrupağa baru öçen aradaşçılarğa 700-1000 yevro arasında aqça birüläre açıqlandı.

Xalıqara migraśiya oyışmasınıñ Tunis missiyäse citäkçese Lorena Londo qaza belän bäyle bolay dide: “Bu faciğane añlatırlıq süz yuq. Bu sannar artında irlär, xatın-qızlar, balalar. Alar bilgesez ber xıyal artınnan barıp ğomerlären özdelär”.

Xalıqara Qızıl ay-Qızıl Xaç cämğıyät’läre federaśiyäse ğomum citäkçese Françesko Rokka soñğı ber atnada Urta diñgez yar buylarında kimendä 110 qaçaqnıñ ülüenä iğ’tibarnı yünältte. Ul xäräkät xälendäge möhacirlärneñ dön’yaküläm saqlawğa ixtıyac toyuların belderde. “Dingezdäge bu ülemnär däwam itkändä êndäşmiçä qala almıybız. Tormışnı qurqınıç astına quyuçı bernindi säyäsi qarar qabul itelä almıy,”-dide Rokka.

Tunis Ğaräp yazı dip ataluçı prośesstan çığa aldı, ämma inqıylab ışandırğan iq’tisadi ömetlär aqlanmadı. İlneñ kön’yaq häm êçke töbäklärendä êşsezlek 25%tan artıq. Şuña kürä xalıq, bigräk tä yäş’lär, Urta diñgez aşa qanunsız yullar belän Awrupağa kitärgä tırışa.