Germaniyada İkençe Bötendön’ya suğışınnan qalğan bomba şartladı
Germaniyada İkençe Bötendön’ya suğışınnan qalğan häm äle xaman cir astında saqlanuçı meñnärçä şartlamağan bomba buluın farazlıylar
Germaniyanıñ Drezden şähärendä İkençe Bötendön’ya suğışınnan qalğan 250 kiloğrammlı bomba şartladı. Şähärneñ poliśiya süzçese Tomas Gaytner beldergänçä, bombanı täêsirsez xälgä kiterergä mataşqanda qaza bula. Ul bu êşneñ bik awır baruın assızıqladı. Fitil’neñ bomba êçenä batırılğan buluı säbäple täêsirsez xälgä kiterergä mataşu tönlä yartı yulda qala. İkençe talpınış waqıtında ber şartlaw bula. Şul waqıtta bombanıñ östen qaplağan izolyaśiya materialına ut qaba. Tomas Gaytner berkemneñ dä yaralanmawın häm şartlawnıñ zur zarar kitermäwen assızıqlıy. Boralaqtan yünländerelüçe yanğın sünderü robotı belän yanu tuqtatıla häm suıtu êşläre başlana. Soñınnan bronyalı êkskavator yardamendä bombanın östen çistartırğa uylıylar.
Tomas Gaytner bu êşlärneñ tağın niqadär däwam itäçägeneñ bilgele bulmawın söyläde. Şähärdä iminlek çaraları kürelde.
Saksoniya iminlek bülege beldergänçä, xäwef däwam itä. Belgeçlär bomba êçendä niqadär şartlatuçı buluınnan xäbärdar tülgel.
Qurqınıçsızlıq maqsatınnan Drezden aêroportı da yabılğan.
Bomba 2 kön êlek tözeleş êşläre barışında tabıldı. Anı täêsirsez xälgä kiterü öçen kiçä yaqınça 8 meñ 700 keşe öylärennän êvakuaśiyälände. Bomba tabılğan cir çolğap alındı häm kerü tıyılğan urın bularaq iğ’lan itelde.
Germaniyada uzğan ayda Berlinda häm Paderborn şähärlärendä, bıltır isä Gannoverda İkençe Bötendön’ya suğışınnan qalğan bombalarnı täêsirsez xälgä kiterdelär, 10 meñnärçä keşe öylärennän kitep torırğa mäcbür buldı.
Germaniyada İkençe Bötendön’ya suğışınnan qalğan häm äle xaman cir astında saqlanuçı meñnärçä şartlamağan bomba buluın farazlıylar.
