M'yanmada bäreleşlär

M’yanma tön’yağındağı Kaçın rayonında armiya köçläre belän etnik fetnäçe törkemnär arasında bäreleşlär arta bara. BMO mäğ’lümatlarına kürä, älege çualışlar näticäsendä ğıynvar ayınnan birle kimendä 10 meñ keşe küçenergä mäcbür qaldı. Kaçındağı baş kütärüçelär komitetına citäkçelek itüçe Zau Raw wäzğıyät’neñ Arakandağığa oxşıy baruın belderä. “Bu bezne çistartuğa yünälgän suğış”, - di ul. Etnik törkemnär üzläreneñ armiya tarafınnan yuq itelügä duçar buluın söyli.

Zau Raw xökümätneñ fetnäçel rayonnarda yäşäwçelärneñ tormışın awırlaştırırğa tırışuın äytä. Cirlektä balalarnıñ tuqlanuı torğan sayın naçarayuın belderälär.

Arakandağı şikelle Kaçın häm Şan rayonında da öylärennän kitärgä mäcbür bulğan 120 meñ keşegä yärdäm citkerügä xökümät kirtä quya.    

Zau Raw süzlärenä qarağanda, xakimiyätkä 2016nçı yılda M’yanmanıñ xäzerge tışqı êşlär ministrı häm ilbaşı êşläre öçen cawaplı Aung San Su Çji kilgännän soñ ireklärne qısuda citdi artu küzätelä.  Süz uñayınnan, Aung San Su Çji - Nobel’neñ tınıçlıq büläge iyäse.