Skripal’nıñ ağulanuı belän bäyle yaña açıqlaw

Ximik qorallarnı tıyu oyışması ikeyaqlı agent Sergey Skripal’ häm qızı Yuliyanıñ 4nçe martta Angliyanıñ Solsberi şähärendä ağulanuında xärbi sıyfatlı häm nervğa täêsir itüçe ximik matdä qullanıluın belderde. Angliya älege oyışmadan yärdäm sorağan bulğan. Bäysez belgeçlär törkeme tikşerülärdän coñ näticä çığardı häm xisabnı här taraftağı illärgä cibärde. Angliya, şulay uq, cämäğat’çelekkä belderüne dä taläp itte.

İnglizlärneñ tışqı küzläw oyışmasına mäg’lümat birüe açıqlanğannan soñ rus agentı Sergey Skripal’ üz ilendä xökem itelde. Soñınnan ul şımçı almaştıru buyınça irekkä çıqtı häm Angliyağa sıyındı. Anı häm qızı Yuliyanı 4nçe martta Solsberi şähärendä añsız xäldä taptılar.    

Angliya bu waqıyğada Rusiyädä yasalğan ximik matdä qullanıluın alğa sörde. Anıñ Sovetlar Soyuzında 1970nçe-1980nçe yıllarda çığarılğan “Noviçok” dip isemlängän nerv sistemasına täêsir itüçe gazlar törkemennän buluın belderdelär.

Waqıyğadan soñ London 23 rus diplomatın ildän çığardı. Aña başqa däwlätlär dä quşıldı. Rusiyä dä qayber illärneñ diplomatların quu turında qarar qabul itte.