105 fälästinleneñ xäle awır

Gazzä çigendä “Böyek Qaytu yöreşe” çarası barışında İzrail’ xärbiläre tarafınnan yaralanğan 3078 fälästinleneñ 105 awır xäldä. Bu xaqta Gazzä Sälamätlek saqlaw ministrlığı süzçese Äşräf äl-Kudra belderde. Yaralılarnıñ 305e – bala, 78e – xatın-qız häm 12se mediśina xezmätkäre. 129 keşeneñ başına yäisä muyınına atqannar. “İzrail’ basıp aluçıları yöreştäge tınıç xalıqqa beläräk ata”,-di Kudra. Ul çara waqıtında 4 aşığıç yärdäm maşinası häm grajdanlıq saqlanu texnikasınıñ turıdan-turı nişanğa alınuın belderde.

Mäğ’lümat çaraları cıyılışında Daru häm daruxanäçelek idaräse mödire Mönir Bäräş isä töbäktä darular häm mediśina kiräk-yaraqları citmäwenä basım yasadı. Çönki şähit häm yaralılarnıñ sanı kön sayın kübäyä. Bäräş, bu nisbättän, xalıqara yärdäm oyışmalarına möräcäğat’ itte. Ul yaralı häm awırularnı däwalawnı däwam itä öçen Gazzäneñ sälamätlek saqlaw tarmağına yärdäm itärgä çaqırdı.