Franśiyada êş taşlawdan zıyan

Franśiya xalıqara timer yulı idaräse xezmätkärläreneñ 22nçe martta başlanğan êş taşlawları 100 million yevro zarar kiterüe bilgele buldı. Bu xaqta oyışmanıñ başqaruçı direktorı Giyom Pepi belderde. Ul xezmätkärlären 22nçe marttan birle 5 kön êş taşlawın söyläde. Häm monıñ il iq’tisadına zur zıyan saluın assızıqladı. “Säfärgä çığuçı poyızd sanı az bulu säbäple ber köndä 20 million yevro yuğaltabız”,-di direktör. Êş taşlawğa qaramastan, yuğarı tizlekle poyızdlarnıñ 20 %ı yulçı taşuın däwam itä. Şähär arası poyızdlarnıñ 6dan bere yulda. Pepi beldergänçä, bu sannar Franśiya timer yulları êşçänlegeneñ tulısınça tuqtamawın kürsätä.

Franśiyada xalıqnıñ 72 %ı timer yulları reforması yaqlı. “Bu keçkenä genä üzgäreş tügel, tarmaqnıñ 80 yıllıq kiläçäge planlaştırıla, şuna qarap adım yasıybız”-di başqaruçı direktör.

İldä 4 hönäri berlek xökümätneñ timer yulların xosusıylaştıru häm xezmätkärlärneñ statusın üzgärtüne üz êçenä alğan reforma proyıktına qarşı rizasızlıq çarası ütkärü qararı çığardı. Ul 28nçe iyun’gä qadär atnanıñ bilgele könnärendä êş taşlawnı küzallıy. Ämma, uzğan atnada transport ministrı Êlizabet Born belän oçraşudan soñ, çaralarnı tağın da ozınaytu mömkinlege turında süz çıqtı.

İldä mitinglar häm butalçıqlarğa säbäp bulğan proyıkt bügen parlamentnıñ könüzägendä.