Afrinğa gumanitar konvoy cibäreläçäk

BMO Süriyäneñ Afrin töbägenä yaqın arada yärdäm konvoyı cibäräçäk. Bu xaqta Gumanitar êşlär öçen cawaplı Gomum särqatip urınbasarı Mark Lokok belderde. Ul “utnı tuqtatu” qararınıñ, çığuınnan soñ 30 kön ütügä qaramastan, xaman tormışqa aşmawı belän bäyle cıyılışta çığış yasadı. Lokok Süriyädä berniçä aydır iñ awır gumanitar krizisnıñ däwam itüen assızıqladı. 24nçe fevral’dä qabul itelgän “utnı tuqtatu” qararınnan birle xärbi operaśiyälär häm hawa höcümnärendä 1700dän artıq keşeneñ ğomere özelde, meñnärçä keşe yaralandı. 28 sälamätlek saqlaw üzäge bombalandı. Soñğı atnalarda Duma, Xarästa, Sakba häm Käfär Batnada meñnärçä keşe cirlärennän quılğan, 80 meñ keşe Dimäşq’qa häm qırlarğa kitärgä mäcbür bulğan. Lokok 20 meñ keşeneñ Süriyä tön’yağına küçüen söyli. Ul çığışında Arfinğa da tuqtaldı. Annan 183 meñ 500 keşeneñ Täl Rıfat, Nubul-Zähra, Mänbiç häm Xasäkägä kitüe bilgele. Afrinda qaluçılarnıñ sanı 50 meñ belän 70 meñ arasında. Alarğa yaqın arada gumanitar yärdäm cibäreläçäk.

İdlibtäge gumanitar wäzğıyät’ne Mark Lokok ''katastrofik'' dip belderde. Dekabr’ ayınnan başlap 400 meñ keşe höcümnär säbäple öylären taşlap kitkän. Qaçu urınnarı citärlek tügel.