Tramp belän Sälman oçraşuı

AQŞ ilbaşı Donal’d Tramp belän Soğud Ğärabstanı täxet varisı Möxämmät bin Sälman Aq Yortta oçraştı. Anda ike il arasındağı qoral häm investiśiya kileşüläre, İran mäs’äläse telgä alındı. Tramp Oval bülmädä jurnalistlarğa ikeyaqlı häm töbäk mönäsäbätlärenä bäyälämä birde.  Êlekkege ilbaşı Barak Obama çorında AQŞ – Soğud Ğärabstanı arası “kiyerenke” ide. “Xäzer isä mönäsäbätlärebez iskitkeç häm tağın da yaxşıraçaq”,-di Tramp. İlbaşı beldergänçä, Soğud Ğärabstanı soñğı waqıtta AQŞtan milliardlarça dollarlıq qoral alğan häm bu êş däwam itä. Citeşterü artu näticäsendä AQŞta 40 meñ êş urını açılğan.  Soğud Ğärabstanı 13 milliard dollarlıq Hawa saqlanu sisteması, 3,8 milliard dollarğa taktik taşu oçqıçı, 1,2 milliard dollarğa tanklar häm 1,4 milliard dollarlıq xärbi oçqıçlarğa zakaz birgän. Tramp alarnı yasaw başlanuın häm tiz arada tapşırılaçağın belderde.

AQŞ ilbaşı  İran belän bäyle sorawlarğa: “Bu däwlätneñ adımnarı töbäkkä zarar bira häm monı kontrol’ itergä kiräk”,-dip cawap birde. Möxämmät bin Sälman isä älege mäs’äläne centekläp söyläşäçäklären belderde.