Rus şımçısın ütergän gaznı Angliya çığarğan bulırğa mömkin

Êlekkege rus agentı Sergey Skripal’ häm qızı Yuliyanı ağulağan “Noviçok” ğazı Angliyanıñ Porton Dawn laboratoriyasında yasalğan bulırğa mömkin.  Rusiyäneñ Awrupa Berlege ilçese Vladimir Çijov şulay dip belderde. Ul ingliz qanalı BiBiSiğa birgän interv’yusında Skripal’ belän bulğan waqıyğağa Rusiyäneñ bernindi qatnaşı bulmawına basım yasadı. Çijov beldergänçä, rus xärbi küzätü oyışmasında êşlägändä inglizlärgä mäğ’lümat satqan Skripal’neñ “satlıqcan dip telgä alınuı xaqlı, ämma Rusiyäneñ däwlät bularaq êlekkege şımçıdan alacağı yuq ide”. İlçe, şulay uq, Skripal’ belän qızı añsız xäldä tabılğan Solsberi şähäreneñ Porton Dawn laboratoriyasınnan barı tik 12 kilometr yıraqlıqta buluın xäterlätä. Ul Angliyada ximik qoral yasawçı iñ zur xärbi qorılma.

Çijov Angliyada nerv gazı buluın söylägän berençe rus wäkile tügel. FSBnıñ êlekkege direktorı Sergey Stepaşin da bu ximik matdäne açıqlaw öçen qulıñda anıñ ürnäge bulu kiräklegen beldergän ide.