İzrail xärbiläre studentlarğa höcüm itkän

Fälästinle studentlar oyıştırğan rizasızlıq akśiyasında qatnaşuçılarğa İzrail xärbiläre çın yädrä belän atqan. 8 keşe yaralanğan. Berseneñ xäle awır. Bu xäl İordan yılğasınıñ könbatış yarındağı Ramallax şähäre yanında bula. Birzeyt universitetında uquçılar İzrail maxsus köçläreneñ çärşämbe könne Studentlar şurası başlığın qulğa aluına rizasızlıq belderü öçen cıyılğan bulğan. Xärbilär alarğa plastik häm çın yädrä belän atqan, küz yäşe çığaruçı gaz sipkän. Ber studentnıñ başı yaralana, anıñ xäle ayıruça awır, dip belderälär Fälästin sälamätlek saqlaw ministrlığınnan.