Balalar yärdäm kötä

Bu qısada Süriyäle balalarnıñ wazğiyätenä iğtibar cälep itü öçen Berläşkän Millätlär Oyışmasınıñ Balalarğa yärdäm kürsätü fondı YUNİSEFnın Germaniyadäge bülege tarafınnan Berlinda matbuğat oçraşuı oyıştırılğan.

Süriyäneñ qamaw astında bulğan 16 şähärendä balalarnıñ aylar buyı yärdäm ala almawına iğtibar cälep itkän oyışma bäreleşüçe taraflarnı aşığıç räweştä balalarnı saqlarğa çaqırğan.

YUNİSEFtan yasalğan açıqlawda Halebtağı bäreleşlärneñ balalarnı tirännän täêsirläwe, bäreleş şartlarınıñ qurqınıçları belän ber rättän su, azıq-tölek häm daru täêmin itüdäge problemalarnıñ balalar öçen här kön risk täşqil itüe urın alğan.

Oyışma öysez qalğan meñnärçä bala-çağanıñ salqında qaluın assızıqlağan.

Läkin YUNİSEFka kürä Halebta ğına tügel, ä Süriyäneñ qalğan töbäklärendä dä bombağa totular häm qamaw arqasında balalar qurqınıç astında.

Yaqınça 6 million balanıñ yärdämgä moxtac buluın açıqlağan oyışma balalarnıñ watandaşlar suğışınıñ 6nçı qışında da xastalıq häm salqınnar belän köräş alıp baruına basım yasağan.

Oyışma şaqtıy ğailäneñ başqa illärgä küçep kitüen, fäqirlektä yäşäwen, azıq-tölek, cılınu häm cılı kiyemnär kebek ixtıyacların qanäğatländerä almawın açıqlağan.

YUNİSEF mäğlümatlarına kürä bıyıl Süriyädä mäktäplär maqsat itep alınğan 84 höcümdä 69 balanıñ ğomere özelgän häm kübese dä yaralanğan.

YUNİSEF bıyıl barlığı 700 meñ balanı salqınnan saqlawnı maqsat itä.

Läkin räsmi zatlar bu maqsatqa ireşä alu öçen yärdämgä ixtıyaclarınıñ buluın belderä.