Qız balalar nigä bäxetsez?

Yärdäm oyışması “Save the Children”ğa kürä bar dönyada här 7 sekundta ber 15 yäştän keçkenä qız bala kiyäwgä çığarğa mäcbür itelä.

Oyışmanıñ “Every Last Girl – Härber qız bala” isemle êşçänlegendä illär mäktäpkä baru, keçkenä yäştä kiyäwgä çığu, awırğa uzu, äni keşe ülemnäre häm parlamenttağı xatın-qız sanına kürä isemlekkä kertelgän.

Moña kürä qız balalar cähatennän 144 ildä tormış sıyfatı iñ yaxşı bulğan il Şveśiya bulğan.

Finlyandiya, Norvegiya, Hollandiya häm Belgiya berençe bişlektä urın ala.

İsemlek azağında Urta Afrika Cömhüriyäte, Çad häm Niger bar.

Oyışma tikşerüenä kürä Äfğanstan, Yämän, Hindıstan häm Somali dä aralarında bulğanq ayber illärdä 10 yäşlärendäge qız balalar da kiyäwgä çığarıla.

“Save the Children” keçkenä yäştä kiyäwgä çığunıñ qız balanıñ tormışına här yaqlap tiskäre täêsir itüen citkergän.

Qız balalarnı irtä kiyäwgä çığarğa mäcbür itüçe faktorlar arasında bäreleş, fäqirlek häm humanitar krizislar bar.

“Save the children”nıñ idarä şurası başlığı Helle Thorning-Schmidt: “Keçkenä yäştä kiyäwgä çığu qız balalarnıñ belem alu, citlegü häm bala bulu xoquqınnan mäxrüm itä. İrtä kiyäwgä çıqqan balalar mäktäpkä yöri almıy häm ğailädä qırıslıq, köçläw belän oçraşu ixtimalları arta. Awırğa uzalar häm censi yul belän yoğuçı xastalıqlarnı yoqtıra alalar,” – digän.

Tikşerüdä qaçaqlar şähärçegendä yäşäwçe qız balalarnıñ irtä kiyäwgä çığu qurqınıçı astında buluı belderelä.

Şaqtıy qaçaq ğailäneñ qız balaların fäqirlektän häm köçläwdän saqlar öçen keçkenä yäştä kiyäwgä birüe citkerelä.

YUNİSEFnıñ çamalawlarına kürä bügenge köndä 700 million bulğan irtä kiyäwgä çıqqan xatın-qızlarnıñ sanı 2030nçı yılda 950 millionğa citäçäk.