"Tınıçlıq urnaştırırğa äzer bez"

Fälästin däwlät başlığı Mäxmüt Abbas İzrail belän tınıçlıq urnaştırırğa äzer buluların äytkän.

Yordannıñ Könbatış üzänlegendä oyıştırılğan konferenśiyaneñ açılışında qatnaşqan Abbas monda yasağan çığışında: “Soñğı waqıtta İzraillelär belän dialog häm söyläşü qapqasın yapqan idek, läkin tınıçlıq qapqasın yapmadıq. Kürşebezgä härwaqıt qulıbıznı suzabız häm alarğa: “Kilegez, tınıçlıq urnaştıru turında söyläşik, bu cirlärdä bergä yäşik” dip äytäbez. Ägär dä qabul itsägez, ğaräp illäre sezne tanır,” – digän.

Abbas çişeleş täêmin itü, toraq punktları tözeleşeneñ tuqtatıluı häm ike taraf arasında tözelgän kileşülärneñ ğamälgä kertelüe şartı belän dialog öçen äzer buluların beldergän.

Fälästinneñ dönya kartasında urın aluı öçen köräş alıp baruların häm şaqtıy xalıqara oyışmağa äğza buluların äytkän Abbas milli däräcädä uñışqa ireşü häm başqalası Könçığış Qüdus-Yerusalim bulğan Fälästin däwläten qoru öçen tağın küp yul uzu zarurlığın assızıqlağan.

İzrail-Fälästin söyläşüläre İzrailneñ toraq punktlarnı tözüne däwam itterüe, 1967nçe yılğı çiklärne häm totqınnarnıñ irekkä cibärelüen qabul itmäwe arqasında 2014nçe yılda tuqtap qalğan ide.