Yapon imperatorı täxeten taşlarğa teli

Yaponiyanıñ 82 yäşendäge İmperatorı Akihito televideniye aşa tapşırılğan millätkä möräcäğätendä, yäşen häm naçaraya baruçı sälamätlegen säbäp itep kürsätep, wazıyfasın däwam itä almayaçağın häm täxetne taşlarğa teläwen äytkän.

İldä xäzerge qanunnarda imperatornıñ wazıyfasın taşlawına qağılışlı qanun xökeme bulmağanğa kürä Akihitonıñ täxeten taşlawı öçen qanunğa üzgäreşlär kertelüe zarur.

Yaponiya Premyer-ministrı Şinzo Abe imperatornıñ wazıyfasın taşlaw telägen xökümätneñ citdi räweştä qarap çığaçağın äytkän.

Akhitio wazıyfasınnan kitkän oçraqta täxetkä 56 yäşendäge ulı prinś Naruhitonıñ utıruı kötelä.

Yaponiyada soñğı tapqır 1817nçe yılda İmperator Koukaku üz teläge belän täxetne taşlap kitkän ide.

Akihito ätise İmperator Hirohitonıñ 1989nçı yılnıñ 7nçe ğinwar könne wafat buluınnan soñ 55 yäşendä täxetkä utırğan ide.