Orlandoda terror höcüme

Amerika Quşma Ştatlarında Florida ştatınıñ Orlando qalasında gomoseksualistlarnıñ tönge klubına oyıştırılğan höcümdä 50 keşeneñ ğomere özelgän ,53 keşe yaralanğan.

Orlandoda ğadättän tış xäl iğlan itelgän.

AQŞ ilbaşı Barak Obama höcümne terror höcüme itep bäyälägän.

Höcümne başqaruçı – çığışı belän Äfganstannan bulğan amerikalı Ömer Mateen.

Höcümneñ cawaplılığın “DEAŞ”terror oyışması üz östenä alğan.

Älege waqiğa Amerika tarixına iñ qanlı höcüm bularaq terkälgän.

Amerika Quşma Ştatlarında yäşäwçe möselman cämğiyätläre wäkilläre ber-ber artlı belderülär yasap borçıluların citkergän.

Möselman oyışmaları şurası “Bez dinenä, tän tösenä,censi saylawlarına qaramastan höcümgä duçar bulğan barlıq keşelärneñ yanında. Bu xain höcümne ğayeplibez”dip beldergän.

Amerika İslami ğıylemnär şurası da höcümne näfrät cinayäte bularaq bäyälägän häm ğayeplägän.

Möselman cämğiyät wäkilläre härkemneñ qırıslıq ,ayırıp qaraw häm höcümgä duçar bulmıyça yäşäw xoquqına iyä buluına basım yasağan.

Noyabr ayında ildä uzaçaq ilbaşı saylawında Cömhüriyätçe partiya namzäte bulu öçen kampaniya alıp baruçı Donald Tramp älege höcümnän soñ “Möselmannarnıñ ilgä kerüe tıyılsın”täqdimen yañartqan.

Tramp sotsial media aşa yasağan belderüendä “İlbaşı Obama monnan soñ radikal İslam terrorı turında süz äytä alaçaqmı? Äytä almasa şunduq wazıyfasınnan kitärgä tiyeş”dip yazğan.

Trampnıñ yullaması Amerika matbuğatınıñ iğtibarın cälep itkän.

 Qayber matbuğat organnarı Trampnıñ mondıy höcümnän son yasağan belderüen forsatçılıq dip bäyalägän.