Putinğa protest
Budapeştta ütkärelgän rizasızlıq belderü çarasında 2 meñ keşe qatnaşqan
Rusiya Federatsiyäse däwlät başlığı Vladimir Putinnı qabul itärgä äzerlängän Vengriyädä yözlärçä keşe aña rizasızlıq beldergän.
Başqala Budapeştta ütkärelgän Putinğa protest belderü çarasında 2 meñ keşe qatnaşqan.
“Putinğa -yuq, Awrupağa - äye” plakatları kütärgän protestçılar Vengriya premyer-ministrı Viktor Orbannı Ukraina krizisına qaramastan Putinnı illärenä çaqırğanı öçen tänqitlägän.
Rizasızlıq belderüçelär Vengriyäneñ Könbatışqa qarawın kürsätü öçen simvolik räweştä şähärneñ könçığışınnan könbatışına taba yöregän.
Xökümätneñ könnän kön Awrupadan yırağayıp , Rusiyägä yaqınayuın däğwa itüçe protsetçılar Rusiya belän bernindi kileşügä qul quymawnı taläp itkän.
Vladimir Putinnıñ Budapeşttağı oçraşularında energetika mäs’äläsenen yänä dä alğı planğa çığuı kötelä.
Säyäsi küzätüçelär Rusiya Federatsiyäse däwlät başlığı Vladimir Putinnıñ Vengiriya säfäre belän Ukraina krizisına qaramastan Awrupa Berlege häm NATOda haman da dusları buluın kürsätergä teläwenä basım yasıy.
