Ukraina bomba astında
Donetsk şähärendäge bombağa totuda küp sandağı keşeneñ ğomere özelgän
Ukraina ğaskärläreneñ Donetsk şähärendäge bombağa totuında küp sandağı keşeneñ ğomere özelgän.
Bombalawda mäktäplär, balalar parklar häm ber xastaxanä zıyan kürgän.
Rusiyä tarafdarları tarafınnan 3 yaqtan qamap alınğan Debaltsevo şähärendä dä bombağa totılğan xalıq şähärdän qaça. Qaça almawçılar isä öylärneñ salqın podvallarında saqlana.
İkençe yaqtan AQŞ däwät särqätibe John Kerry Ukrainanı xuplar öçen Kiyevka kilgän.
Kerrynıñ Ukraina räsmi zatları belän ütkärgän söyläşüdän armiyağa qoral yärdäme qararınıñ çığuı kötelä.
Kerry bu ilgä 16 million dollarlık yaña humanitar yärdäm paketı da täqdim itäçäk.
Ukraina däwlät başlığı Petro Poroşenko da NATO illären saqlanu häm höcümçegä qarşı toru öçen qoral yärdämen kürsätergä çaqırğan.
Germaniyada basılıp çıqqan “Die Welt” gazetına äñgämä birgän Poroşenko zamança qorallarğa iyä, köçle armiyağa ixtıyac toyuların, NATOnıñ Rusiyä başlatqan Gibrid suğışnı, Awrupadağı kiyerenkelekne häm Awrupa-Atlantik iminlek sistemasına yünälgän yanawlarnı çınlıqçı räweştä bäyäläwe zarurlığın beldergän.
Poroşenko: “Ukraina tınıçlıq teli. Tınıç xalıqnı höcümnärdän saqlarğa bulışaçaq zamança qorallarğa iyä, köçle armiyağa ixtıyacıbız bar,” – digän.
Töbäktä basımnıñ kütärelüe xalıqara cämğiyätne dä eşkä kereşterde.
Frantsiya däwlät başlığı François Hollande belän Germaniya Kantslerı Angela Merkel pänceşämbe könne Kiyevka, comğa Mäskäwgä bara.
Bu waqıtta Papa Frantsisk Ukrainanıñ könçığışındağı suğışnıñ xristiyannar arasında uzuın, monıñ skandal buluın äytkän.
Papa Frantsisk: “Ukrainadağı suğış xristiyannar arasında bara. Xristiyannar ber-berse belän köräşä, bu – skandaldır,” – digän.
